KA NASHUAKANIT MUKᵘ ANITE ETUTET

Ka nashuakanit mukᵘ anite etutet ekue tshissitutakanniti nenua 6000 km ka ishpish pimutet Stanley Vollant utat pipuna, tshetshi natshishkuat innu nutim Uepishtikueiau-assit. Mitshetuait nenua meshkanaua ka pimutet, tshuapatamuanu ka ishinakuannit utinniun Stanley Vollant mak anitshenat ka uitshikuht nenu etatusseti natukunisha

Ka minushishit Sophie kie ka massenitakushishit

Neme pipun 1995, nitshishkuem mak nin nui utauassimitan. Ekᵘ, miam kutakat etiht, nikutshipanitatan kie ninan, mukᵘ katshi mitshetupishimua apu minupanit kie shash apu minuenitamaht. Tapue peikupipuna katshi natukunishiuian, nimateniten tshekuan tshe ui tutaman, tshe ui nashatsheian eitinanut. Nititeniteti, tshetshi minupanit nitinniun, tshipa ui minuau nitatusseun kie nipa ui utauassimin!. Eukuan ne etenitamaht nitishkuem mak nin, nitshitapatetan anite kamatau-pikutakanit, uauinakanuat anite tshiussanissat nete ait assit Chine ka ishinikatet, mishta-mitshet nipuat ishkuessat itatshimunanu. Nikatshitaukunan ne essishuenanut ekue ititishuiat, uanua eka menupanit tshetshi utauassimiat pitama, ekue itenitamat tshetshi natatshit peikᵘ auass tshetshi ushimutshit. Minekash nititanan tshetshi minupanit tshetshi kanuenimatshit ne auass, nitishitshimetan nete Chine, uashtessiu-pishimᵘ1996, tshetshi natatshit nitanishinan. Nemenu ushkat uetinak, nimishta-mati. Apu nita ut itenitaman tshetshi mishta-minuenitaman. Mukᵘ peikushteu-tatupishimueshipan mak nimamitunenitamuati ka ishpish tshekuannu uapatak anite ka inniut. Shash nitshissenimatan tshe ishinikatatshit : Marie-Alice. Marie kanapue nukum ishinikashupan Marianna mak Alice ne nituss ka ishinikashut, ka kanuenimit e auassiuk. E nishiht nananat nipipanat pipunut. Ekue uapatinikauiat ne nitanish, nuitamakaun eshinikatakanit anite, Sho Phe Yang, Sho Phe issishuemakan «Ka minushishit kie ka massenitakushishit». Eukuan ekue itenitamat tshetshi ishinikatatshit Sophie-Alice.

Ka pitukaiakanit Stanley Vollant nete mishta-katshishkutamatsheutshuapit Munianit

Ushkat ka matishauet natukunish Vollant

Nuitsheuakan John

Nutenakanipan anite katshishkutamuakanit tshipa ishi-pitutsheuat tshe ui natukunishiuht auenitshenat, ekue tshi pitutsheian kie niminupuan tshetshi pitutsheian neme pipun 1984. Neme kutak pipun, mishta-katshishkutamatsheutshuap Munianit pitukaieu kutaka innua, Ojibwé anite ka utshipanit minishtikut Manitoulin, John Big-Canoe ishinikashupan. Nitutakuti tshetshi natshishkuk kie nitikuti tshetshi uitshik tshetshi pikutat kie tshishtat tsheshkutamuakanit. Shash itatussepan ‘physiothérapeute’ ka uitshiat auennua iakushiniti uianu. Shash utaumauipan, nishinipani kie ma nishtinikupani utauassima. Mitshetuau kutshipanitashapan tshetshi pitutshet anite katshishkutamuakanit ekue tshek tshi pitutshet tshetshi natukunishiut. Nimishta-minu-uitsheuakanitutatutan. Ninan e nishiat anite mishta-katshishkutamatsheutshuapit Munianit kie uetshipaniat anite innuat ninishtuapatiniatananat kutakat katshishkutamuakanishiht innua. Neme pipun 1994, katshi tshishtaiat katipan anite, niminuenitetan uiapamituiat nete Kanesatake, mekuat e niminanut. Nuitamakuti nete etusset ka utshipanit minishtikunu Manitoulin, shash anite peikupishimua kie utinu iapashtat tshetshi shatshuapamat utakushiunima nete pessish minishtikua tekuaniti pessish epit. Tshika uapamitunan minuat nitissishuetan, mukᵘ nishupishimua katshi uapamak ekue petamuk nepukue. Mishta-nutinikupan anite shakaikanit ekue kuetipishkat ekue neshtuapauet. Mishta-kassenitakuannu nenu eshi-nipit! Peikupishimua mukᵘ tshiam katshi tshishtat mishta-mitshetupipuna tshishkutamuakanit tshetshi natukunishiut, tshe matshipanit nana. Mitshetupipuna ma anite, ninatueniteti tshetshi uinakanit anite ka mamuituht natukunishat ute Canada-assit, anutshish anitshenat innuat ka uauitshiaushiht tshipa tshi minakanuat nenu shunianu ka ishinikatenit Natukunish John Big Canoe.

Uetaumaunanuti patetat-tatunnu ashu peikᵘ etatupipuneshinanuti

Aimun petshitinakanit tshetshi shaputuepannanut, tshetshi eka punnanut

Ka natshishkuat innu-utshimaua Wendat, Max Gros-Louis

Ka pitutshet tshetshi natukunishiut Stanley

Stanley Vollant ka petat pakushenitamunnu

Ka natu-shetshiakanit e nanutshikuakanit mak innuat ka uauitshitishuht

Nete kamamishishtiht tsheshkutamakauian, miam peikussiani nititamatshuti. Apu ut minuatikauian usham e innuian mak ninanutshikakuti kie ashit e mishta-shakuenimuian kie eka shukᵘ  aimian, apu ut taht nuitsheuakanat tshe aimikau. Ushkat nemeni pishimua nimishta-animatsheniteti, nuash ekue katshishkutamuakanishiht kaumikunimiht, etatu ka tshishenniuht kie ka apiht nete nishᵘ , nishtᵘ  kie ma neu ka mamishishtiniti ekue uapamiht nenu etutakauian. Anitshenat kaumikunimiht ka tshissenitahk e nanutshikakauian anite netupissit etuteiati nete Loretteville, ekue tshishpeuashiht, peikuan iapit eka ishinnuian miam uinuau. Anitshenat innuat Wendats, minu-uitamuepanat nenua mishtikushua tshetshi eka nanutshikakauian, tshetshi eka tatshinikauian, tshika tshissenitamuat tshe tutuakaniht! Etatu ekue ishpitenimikauian, nikanuenimikuti kie etatu niminu-utinikuti. Nanikutini ninanutshikakuti kie nitishinikatikuti «sauvage». Mukᵘ  apu ut mishta-mashikakauian. Ekue tshi metikat tutaman nitapun kie minu-uitsheuakanitutukau passe Wendats innuat.

Ka tipatshimut Sabrina Godbout

Utshimau mak utshimashkueu Tanguay utipatshimunuau

Ka innu-nikan-tshissenitakanit

Katshi tshishtaian tsheshkutamakauian, neme pipun 1994, nete ninatshi-atusseti Baie-Comeau ekᵘ neme etatusseian, peikutshishikua nititati papeikuminashtakana nete nitinnu-assit. Mitshet tshishennuat ninatukuiatiat, nitikutiat eka kueshkupaniht nenu netukunishiuk. Ekue ishiht, shashish an uitakanipan anite ka nikan tshissenitakanit tshe natukunishiut peikᵘ innu. Uinuau itenitamuat, apu shetshen an natukunishiuan. Nuauitamakutiat nukumipana Clarisse, eukuan mashten kamanitushit ishkueu anite innu-assit. Nipishapan nana ka nishtupipuneshian, apu tshissituk nin, mukᵘ nitipatshimushtutakuti, eshakuminashtakana ninatikushapan kie nikanuenimikushapan uenapissish. Anitshenat tshishennuat ipanat, nin an mukᵘ tshiam nutinikushapan nana nukum. Nipa minikᵘ nenu utshissenitamun, tshetshi natukuik auen. Ka nitautshian, apu ut tshissenitaman ne kie nin nutineni tshekuan tshe tshishkutamakauian. Nin etenitakushian ka natu-tshissenitak tshekuannu kie eka shukᵘ ka tapuetak, nititishuti eukuan ishinakuanutshe. Ekᵘ ne kutak kueshte etenitakushian e innu-mamitunenitaman niteniteti tshetshi natukunishiuian eukuan eshinakuak nimeshkanam. Kie niteniten miam ishinakuan, nitshipain nana ka tshinikuanishkaman. Minuau ne tipatshimun tshe ashu-minakau nitauassimat, tipatshimun ka minushtat nitinniunnu.